اے بی ڈی ویلیئرز کے ورلڈکپ کھیلنے کے امکانات روشن

جنوبی افریقہ کے سابق کپتان اور جارح مزاج بلے باز اے بی ڈی ویلیئرز کے ٹی 20 ورلڈ کپ میں شمولیت کے امکانات روشن ہوگئے، ٹیم کے موجودہ کپتان ڈو پلیسس نے تصدیق کردی۔

تفصیلات کے مطابق جنوبی افریقہ کرکٹ ٹیم کے کپتان ڈوپلیسس نے تصدیق کی ہے کہ اے بی ڈی ویلیئز سے آئندہ سال ہونے والے ٹی 20 ورلڈ کپ میں شمولیت پر بات چیت چل رہی ہے، امکان ہے کہ وہ استعفیٰ واپس لے کر ٹیم میں شامل ہوجائیں گے۔

غیر ملکی خبررساں ادارے کے مطابق مایہ ناز کھلاڑی ڈی ویلیئرز صرف آئندہ سال ہونے والے ورلڈکپ تک اپنا استعفیٰ واپس لے سکتے ہیں، بعد ازاں وہ کرکٹ کو ہمیشہ ہمیشہ کے لیے خیرباد کہہ دیں گے۔ اپنے ایک بیان میں جنوبی افریقہ کے کپتان ڈوپلیسس کا کہنا تھا کہ شائقین کے ساتھ ساتھ میں بھی چاہتا ہوں کہ اے بی ٹیم میں واپس آئیں۔

انہوں نے بتایا کہ ٹیم انتظامیہ اس سلسلے میں گزشتہ تین ماہ سے ان سے رابطے میں ہے۔

ڈوپلیسس کا مزید کہنا تھا کہ اس بارے میں ڈی ویلیئرز اور ٹیم کے چیف کوچ مارک باؤچر کے درمیان کافی پہلے سے ہی بات چیت چل رہی ہے۔ باؤچر نے دو روز قبل کہا تھا کہ وہ اے بی ڈی ویلیئرز سے عالمی کپ کھیلنے کے لیے کہیں گے۔

خیال رہے کہ رواں سال جون میں جنوبی افریقہ کے سابق کپتان اے بی ڈی ویلیئرز نے ورلڈ کپ کے لیے ریٹائرمنٹ واپس لینے کی پیش کش کی تھی تاہم چند وجوہات کی بنا پر بورڈ نے پیش کش مسترد کردی تھی۔

یاد رہے گزشتہ سال مئی میں جارح مزاج بلے باز ڈی ویلیئرز انٹرنیشنل کرکٹ سے ریٹائرمنٹ کا اعلان کرچکے ہیں۔

Email This Post

آپ یہ بھی پسند کریں گے مصنف سے زیادہ

تبصرے بند ہیں.