’درست دام‘: ’اگر اشیا کا معیار اچھا ہوا تو بات بن جائے گی‘

گر آپ پاکستان کے وفاقی دارالحکومت اسلام آباد کے باسی ہیں اور اشیائے ضروریہ مثال کے طور پر سبزی اور پھل خریدنے کےلیے بازاروں کے چکر کاٹنے سے تنگ آ چکے ہیں تو اسلام آباد انتظامیہ نے اس کا حل ڈھونڈ نکالا ہے۔

آپ مرغی کھانا چاہتے ہیں یا دال، بھنڈی کریلے کا موڈ ہو رہا ہے یا آلو انڈے پکانے کا دل ہے، بس فون اٹھائیں، ایپ کھولیں، آرڈر کریں اورانتظار فرمائیں، کیونکہ اسلام آباد انتطامیہ سرکاری نرخوں پر فری ہوم ڈیلیوری کی سہولت کے ساتھ کچن آئٹمز آپ کی دہلیز پر پہنچا دے گی۔

ڈپٹی کمشنر اسلام آباد حمزہ شفقات نے اپنے ٹویٹ کے ذریعے شہریوں کو خوشخبری سنائی کہ ’بہت جلد اسلام آباد انتظامیہ ضروری اشیائے خورد نوش کو آپ کے گھر فری ڈیلیوری کے ذریعے پہنچانا شروع کر رہی ہے ۔ بہترین کوالٹی اور وہ بھی سرکاری ریٹ پر۔ ابھی ’درست دام‘ کو انسٹال کریں اور چند دنوں میں اس آفر سے فائدہ اٹھائیں۔ مارکیٹ سے آدھی قیمت میں چیزیں آپ کی دہلیز پر‘۔

درست دام کیا ہے؟

’درست دام‘ ایک موبائل ایپلیکیشن کا نام ہے جو اسلام آباد انتظامیہ نے نیشنل انفارمیشن ٹیکنالوجی بورڈ (این آئی ٹی بی) سے تیار کروائی ہے۔ اس ایپ کے ذریعے اسلام آباد کے شہری سودا سلف ، سبزی اور پھل وغیرہ کا آن لائن آرڈر بک کرا سکتے ہیں۔

ایپ پر اشیائے ضروریہ ، سبزی اور پھل کی تین آپشنز رکھی گئی ہیں۔ صارفین کی سہولت کے لیے دستیاب اشیا کے نام اوران کا مارکیٹ نرخ بھی درج ہے۔

صارفین اپنی ضرورت کی اشیا منتخب کرکے گھر بیٹھے آن لائن آرڈر کرسکتے ہیں۔

ایپ میں شکایات درج کروانے کا آپشن بھی رکھا گیا ہے جس پر کلک کرنے سے شہری پاکستان سٹیزن پورٹل پر شکایت درج کرا سکیں گے۔

ڈیلیوری کون کرے گا؟

ڈیلیوری کے لیے اسلام آباد انتظامیہ نے دو کمپنیوں کا انتخاب کیا ہے۔ ’سبزی منڈی‘ اور ’فوری‘ کے نام سے پہلے سے آن لائن ڈیلیوری کا کام کرنے والی کمپنیاں اب اسلام آباد انتظامیہ کی طرف سے ڈیلیوری کی خدمات انجام دیں گی۔

’اردو نیوز‘ نے ڈپٹی کمشنر اسلام آباد حمزہ شفقات سے اس اقدام بارے مزید جاننے کے لیے رابطہ کیا اور پوچھا کہ انتظامیہ کے لیے مستقل بنیادوں پر یہ ذمہ داری نبھانا کیسے ممکن ہوگا جس پر انھوں نے کہا کہ اس کے لیے ایک ہفتہ انتظار کریں تمام معلومات سرپرائز ہیں۔

خواتین کا ردعمل

گھروں میں عموما خواتین ہی کچن کی نگران ہوتی ہیں اور سودا سلف خریدنے کی ذمہ داری بھی ان ہی کی ہوتی ہے۔ بیشتر خواتین اپنی ملازمت کے ساتھ ساتھ گھر کی نگران بھی ہوتی ہیں ان کے لیے بازاروں کے چکر لگانا ذرا مشکل ہوتا ہے۔

آمنہ بیگم بھی ایسی ہی ایک خاتون ہیں۔ اردو نیوز سے گفتگو میں انھوں نے کہا کہ وہ درست دام جیسی سہولت سے فائدہ اٹھانا چاہیں گی۔ امید ہے کہ کوالٹی کا بھی خیال رکھا جائے گا۔ انھوں نے کہا کہ پہلے کم چیزیں منگوا کر دیکھیں گے اگر کوالٹی اچھی ہوئی تو پھر باقاعدہ شروع کر دیں گے۔

ایف ٹین کی رہائشی رشیدہ بی بی نے کہا کہ خود بازار جاتے ہیں تو چھان پھٹک کر چیز لیتے ہیں۔ اب اگر موبائل ایپ کے ذریعے منگوانے کی سہولت مل رہی ہے تو ٹرائی کریں گے۔ اگر معیار اچھا ہوا، کوالٹی بہتر ہوئی تو بات بن جائے گی ورنہ اس کا حال بھی یوٹیلٹی سٹور جیسا ہوگا۔

Email This Post