البرٹو فرنینڈس ارجنٹینا کے نئے صدر منتخب
ارجنٹینا میں بائیں بازو کے امیدوار البرٹو فرنینڈس صدارتی انتخابات میں صدر کو شکست دے کر ملک کے نئے صدر منتخب ہوگئے۔
غیر ملکی خبر رساں ادارے کے مطابق ارجنٹینا میں صدارتی انتخابات میں جسٹسلسٹ پارٹی سے تعلق رکھنے والے امیدوار البرٹو فرنانڈز 45 فیصد سے زیادہ ووٹ حاصل کرکے صدر منتخب ہوگئے۔ انہوں نے موجودہ صدر موریسیو ماکری کو شکست دے دی۔
البرٹو فرنانڈز کے حامیوں اور کارکنوں نے ان کی کامیابی پر خوب جشن منایا اور آتش بازی کی۔
صدر موریسیو ماکری نے شکست تسلیم کرتے ہوئے اقتدار البرٹو فرنانڈز کے حوالے کرنے کا اعلان کردیا ہے۔
ارجنٹینا اس وقت معاشی بحران کا سامنا کر رہا ہے، موریسیو ماکری نے برسراقتدار آنے پر ملک کی معیشت کو ترقی دینے کے وعدے کیے تھے جنہیں وہ پورا نہ کرسکے اور ملک کی کرنسی کی قدر میں نمایاں کمی ہوئی۔
ماہرین نے معاشی زبوں حالی کو موریسیو ماکری کی شکست کی وجہ قرار دیا ہے۔
نومنتخب صدر البرٹو فرنانڈز کو ملکی معیشت کی بحالی کے مشکل چیلنج کا سامنا ہوگا۔
Email This Post
تبصرے بند ہیں.