سعودی حکومت حج انتظامات کوموثر اور آسان بنانے کیلئے جدید ٹیکنالوجی سے بڑے پیمانے پر استفادہ کر رہی ہے ۔امسال امیگریشن ، صحت خدمات اور حج اعمال میں جدید ٹیکنالوجی کا استعمال کیا جا رہا ہے ۔
سعودی جنرل اتھارٹی آف سول ایوی ایشن نے اس سال عازمین حج کے اژدھام میں کمی کیلئے جدہ اور مدینہ منورہ ایئرپورٹ پر جدید ٹیکنالوجی کا استعمال شروع کیا ہے۔
جدہ کے کنگ عبدالعزیز انٹرنیشنل ائیرپورٹ اور مدینہ منورہ کے امیر محمد بن عبدالعزیز انٹرنیشنل ائیرپورٹ پر امسال عازمین حج کو سیلف سروس فراہم کی گئی جس سے انہیں امیگریشن کی کارروائی میں آسانی ہو رہی ہے ۔یہ انتظام محکمہ شہری ہوابازی نے سعودی وژن 2030ء کے تناظر میں کیا ہے ۔
سعودی وزارت حج و عمرہ نے بیرون مملکت اور اندرون ملک سے حج کرنیوالوں پر الیکٹرانک کڑے کی پابندی عائد کی ہے ۔الیکٹرانک کڑے میں حاجی سے متعلق تمام نجی کوائف درج ہوتے ہیں ۔
سعودی میڈیا کے مطابق 4اگست کو مکہ مکرمہ میں ’’حج میں ترقی یافتہ ٹیکنالوجی کا استعمال ‘‘ کے عنوان سے ایک سیمینار ہو رہا ہے ۔اس کا انتظام وزارت داخلہ نے ام القریٰ یونیورسٹی ، محکمہ امن عامہ اور سعودی ہیلتھ کونسل کے تعاون سے کیا ہے ۔سیمینار کی صدارت وزیر داخلہ شہزادہ عبدالعزیز بن سعود بن نایف کریں گے جو اعلیٰ حج کمیٹی کے سربراہ اعلیٰ بھی ہیں ۔
واضح رہے کہ اعلیٰ حج کمیٹی اسلام کے پانچویںرکن حج انتظامات کی پالیسی اور حکمت عملی کی ذمہ دار ہے جبکہ مرکزی حج کمیٹی ، ایگزیکٹیو ادارہ ہے۔
ولیعہد شہزادہ محمد بن سلمان 2برس سے’’ ہیکٹن حج ‘‘کے نام سے زائرین حرم کیلئے جدید ٹیکنالوجی کو مسخر کرنے کی مہم چلائے ہوئے ہیں۔جدہ میں جسے الحرمین گیٹ بھی کہا جاتا ہے ۔ 51ممالک کے نوجوانوں کو 2برس قبل مدعو کیا گیا ۔انہیں حج کو جدید ٹیکنالوجی سے آراستہ کرنے کا چیلنج دیا گیا۔اس کا انتظام سائبر سیکیورٹی سعودی آرگنائزیشن نے کیا تھااس میں 5سعودی لڑکیوں نے ’’ترجمان ‘‘اپلیکیشن پیش کر کے نام کمایا تھا۔اس کی بدولت مکہ مکرمہ ، منیٰ ، مزدلفہ اور عرفات میں تمام رہنما بورڈ کا ترجمہ خود کار طریقے سے ممکن ہو گیا ہے ۔
سعودی حکومت کی حوصلہ افزائی کی بدولت مقامی شہری اور غیر ملکی حج انتظامات کیلئے جدید ٹیکنالوجی سے استفادہ کے لئے تجاویز بھی پیش کر رہے ہیں ۔
تبصرے بند ہیں.