“نوازشریف نے بیرون ملک علاج پر رضامندی ظاہر کردی”

مسلم لیگ(ن) کے صدر میاں شہباز شریف نے کہا ہے کہ پارٹی قائد نوازشریف نے اپنے بیرون ملک علاج پر رضا مندی ظاہر کی ہے۔ شہبازشریف نے پارٹی رہنماؤں کو ہدایت کی ہے کہ عدالت سےریلیف تک بیرون ملک علاج پربات نہ کی جائے۔

تفصیلات کے مطابق میاں شہبازشریف کی زیر صدارت (ن) لیگ  کی کورکمیٹی اجلاس کی اندرونی کہانی سامنے آگئی ہے، کور کمیٹی اجلاس میں پارٹی قائد نوازشریف کی ناسازی طبیعت اور ان کے بیرون ملک علاج کے حوالے سے ممکنہ اقدامات پر غور کیا گیا۔

ذرائع کا کہنا ہے کہ کور کمیٹی کے اراکین نے مشورہ دیا کہ پاکستان میں رہنانواز شریف کی زندگی کیلئےخطرے سے خالی نہیں ہے اس لیے نواز شریف کاعلاج بیرون ملک کرایاجائے۔

اراکین کے مشورے پر پارٹی صدر شہبازشریف نے شرکاء کو بتایا کہ نواز شریف اور مریم نوازسےبیرون ملک علاج کی بات کی ہے اور نوازشریف نےبیرون ملک علاج پررضامندی ظاہرکی ہے۔

ذرائع کے مطابق شرکاء نے اس بات پر اتفاق کیاکہ نوازشریف کوبیماری کی وجہ سے ہی عدالت سے ریلیف مل رہا ہے لہذا فوری طور پر بیرون ملک علاج کی بات کی گئی توکوئی اور رنگ دیاجائےگا۔

شہبازشریف نے پارٹی رہنماؤں کو ہدایت کی کہ عدالت سےریلیف تک بیرون ملک علاج پربات نہ کی جائے۔

واضح رہے کہ نوازشریف لاہور کے سروسز اسپتال میں زیر علاج ہیں، لاہور ہائیکورٹ نے چوہدری شوگر ملز میں ان کی طبی بنیادوں پر ضمانت منظور کی ہے جب کہ اسلام آباد ہائیکورٹ نے العزیزہ ریفرنس میں انہیں منگل تک عبوری ضمانت دے رکھی ہے۔