بھارتی ٹیم فوجی کیپ : پی سی بی کا آئی سی سی کو خط، سخت کارروائی کا مطالبہ

پاکستان کرکٹ بورڈ نے آئی سی سی سے مطالبہ کیا ہے کہ بھارتی ٹیم کے فوجی کیپ پہننے کا سختی سے نوٹس لیتے ہوئے اس کیخلاف کارروائی کی جائے، پاکستان نے کھیل کو ہمیشہ سیاست سے الگ رکھا ہے۔

یہ بات پی سی بی نے انٹرنیشنل کرکٹ کونسل کو لکھے گئے خط میں کہی ہے، چیئرمین پی سی بی نے بھارتی ٹیم کی جانب سے فوجی کیپ پہننے کے معاملے کو آئی سی سی میں اٹھاتے ہوئے سخت مؤقف اختیار کیا۔

خط میں کہا گیا ہے کہ بھارت کا طرز عمل کھیل کے لئے مناسب نہیں ہے البتہ پاکستان نے کھیل کو ہمیشہ سیاست سے الگ ہی رکھا ہے، بھارت کھیل کو سیاست کا شکار نہ کرے، بھارت نے آئی سی سی سے اجازت کسی اور چیز کیلئے لی لیکن عمل کچھ اور کیا۔

پی سی بی کے ارسال کردہ خط میں مزید کہا گیا ہے کہ آئی سی سی جس طرح ماضی میں عمران طاہر اور معین علی کے خلاف کارروائی کرچکا ہے اسی طرح بھارت کیخلاف بھی کارروائی کی جائے،حکومتی سطح پر بھی بھارتی ٹیم کے طرز عمل کو ناپسندیدگی کی نگاہ سے دیکھا گیا تھا۔

واضح رہے کہ گزشتہ روز آسٹریلیا کے خلاف کھیلی جارہی ون ڈے سیریز میں بھارتی ٹیم نے ایک میچ فوجی ٹوپیاں پہن کر کھیلا تھا۔ میچ سے قبل سابق بھارتی کپتان مہندر سنگھ دھونی نے بھارتی ٹیم میں فوجی ٹوپیاں تقسیم کی تھیں۔

اس حوالے سے بھارتی بورڈ کا مؤقف ہے کہ یہ اقدام ٹیم کی جانب سے پلوامہ حملہ میں ہلاک ہونے والے چالیس فوجی جوانوں کے اہل خانہ سے اظہار افسوس کیلئے تھا۔