پاک بحریہ کی بحری مشق شمشیر البحر VII اور ترسیل بحر II کی افتتاحی بریف کا کراچی میں انعقاد کیا گیا، صدر مملکت ڈاکٹر عارف علوی تقریب کے مہمان خصوصی تھے۔
صدرِ مملکت ڈاکٹر عارف علوی کا تقریب سے خطاب کرتے ہوئے کہنا تھا کہ بھارت کی جانب سے مقبوضہ کشمیر میں کیے جانے والے غیر قانونی اقدامات کا اثر جنوبی ایشیاء کی مجموعی سیکیورٹی پر ہوگا، پاکستان مسئلہ کشمیر کے حل تک بھارتی مظالم کو ہر سطح پر اجاگر کرے گا۔
ڈاکٹر عارف علوی نے مزید کہا کہ بھارت سی پیک اور گوادر پورٹ کے منصوبوں کو بھی نقصان پہنچانا چاہتا ہے، پاکستان کا دفاع مضبوط ہاتھوں میں ہے اور مجھے افواج پاکستان پر فخر ہے ۔
انہوں نے کہا کہ پاکستان کی معاشی ترقی سمندر سے بلا تعطل تجارت پر منحصر ہے جس کے لیے پاک بحریہ کا کردار انتہائی اہمیت کا حامل ہے۔
ترجمان پاک بحریہ کے مطابق صدر مملکت کو پاک بحریہ کی جنگی اور آپریشنل تیاریوں پر بریفنگ بھی دی گئی ، پاک بحریہ کی یہ مشق شمشیر بحر ہر 2 سال بعد منعقد کی جاتی ہے۔
ترجمان پاک بحریہ کے مطابق بحری مشق شمشیر بحر میں تینوں افواج اورمتعلقہ وزارتوں کے نمائندگان بھی شریک ہوں گے، بحری مشق شمشیر بحر کا مقصد ایسے تصورات کو عملی طور پر جانچنا ہے جنہیں بعد ازیں ملکی بحری حکمت عملی کا حصہ بنایا جا سکے۔
Email This Post
تبصرے بند ہیں.