پاک فضائیہ کے نمبر 11ملٹی رول اسکواڈرن نے سومیانی فائرنگ رینج میں منعقدہ انٹر اسکواڈرن آرمامنٹ مقابلے جیت لیے۔
ان مقابلوں کی اختتامی تقریب پاک فضائیہ کے ایک آپریشنل ایئربیس پر منعقد ہوئی جس کے مہمانِ خصوصی پاک فضائیہ کے سربراہ ایئر چیف مارشل مجاہد انور خان تھے۔
اس موقع پر خطاب کرتے ہوئے ایئر چیف نے کہا کہ پاک فضائیہ اپنی جنگی صلاحیتوں کو بڑھانے کے لیے جدیدیت اور خود انحصاری کی راہ پر گامزن ہے۔
انہوں نے مزید کہا کہ پاک فضائیہ مادر وطن کے فضائی دفاع کے لیے ہمہ وقت تیار ہے اور ہمیشہ پورے عزم اور حوصلے کے ساتھ قوم کی آواز پر لبیک کہتی ہے۔
ایئر چیف نے کشمیر کی صورتحال پر روشنی ڈالتے ہوئے کہا کہ ہم اپنے کشمیری بھائیوں کے حقِ خودارادیت کی جدوجہد میں ان کے ساتھ کھڑے ہیں، انہوں نے اس بات کا اعادہ کیا کہ کشمیر میں انسانی مظالم کو فوری طور پر ختم ہونا چاہیے۔
پاک فضائیہ کے سربراہ نے مزید کہا کہ ہم اس صورتحال پر پوری طرح نظر رکھے ہوئے ہیں اور اپنی فضائی سرحدوں کی حفاظت سے ہرگز غافل نہیں ہوسکتے۔
10 اکتوبر کو شروع ہونے والے ان مقابلوں میں تمام جنگی جہازوں سے منسلک پائلٹس نے اپنی بہترین پیشہ ورانہ صلاحیتوں کا مظاہرہ کرتے ہو ئے اپنے اہداف کو ٹھیک ٹھیک نشانہ بنایا۔ نمبر 11 ملٹی رول اسکواڈرن کو بہترین کارکردگی کی بنا پر ان مقابلوں کا فاتح قرار دیا گیا۔
پہلی مرتبہ متعارف کروائی گئی بیسٹ آرمامنٹ ٹرافی مشترکہ طور پر نمبر 2 اسکواڈرن اور نمبر 8 اسکواڈرن کو عطا کی گئی، جبکہ مینٹیننس ٹرافی نمبر 14 اسکواڈرن نے حاصل کی۔
ونگ کمانڈر نعمان اکرم کو انفرادی طور پر بہترین نشانہ بازی کا مظاہرہ کرنے پر شیر افگن ٹرافی سے نوازا گیا۔
ان مقابلوں میں پاک فضائیہ کی تمام فائٹر اسکواڈرنز کی کارکردگی کو جانچا گیا، جہاں JF-17 نے اپنی نمایاں کار کردگی کی بدولت پاک فضائیہ میں اپنی حیثیت صفِ اوّل کے لڑاکا طیارے کے طور پر منوا لی ہے۔
Email This Post
تبصرے بند ہیں.